Вавёркі
Сяргей Чыгрын
Дзве вавёрачкі-сяброўкі
Працавлі дружна, лоўка.
Днём і вечарам не спалі,
Бо арэшкі ўсё збіралі.
Назапасілі нямала.
Неўпрыкмет зіма настала,
Ды вавёркі не сумуюць-
Чай з арэшкамі смакуюць.
Так, без клопатаў,яны
Дачакаюцца вясны.
Зарадка
Ніна Галіноўская
Козлік з козлікам гуляе,
Козлік Козліка бадае:
Рожкамі - у рожкі.
Шырай, шырай ножкі!
Разбягаюцца ў бакі,
Зноў сыходзяцца біткі.
Лёгкія, сур'ёзныя,
Ды зусім не грозныя.
У сяброў усё ў парадку:
Робяць так яны зарадку.
Зайку жыць смялей.
Серафіма Берастава
Снег кусты засыпаў, мох
І на дрэвах вецце.
Зайку шэраму цяпер
Жыць смялей на свеце.
Бабка сеяла рассаду.
Лідзія Гардынец
У гараодзе каля саду
Бабка сеяла рассаду.
А каточак на граду:
-Можа, мышку тут знайду
Ці спалохаю крата?
Градку грэбаць-любата!
Бабка ахнула:-Гультай!
У гумне мышэй шукай!
Атрымаеш па хвасце.
Тут раасада хай расце!
Мышы ўкралі боты
Ала Канапелька
У ката-вуркоты
Мышы ўкралі боты.
Дзве сяброўкі
Ўзялі падкоўкі.
Модніцы-бабулі
Абцасы сцягнулі.
А блішчастыя халяўкі
Дружна з'елі ўсе пад лаўкай.
Ах, якая смаката-
Боты добрыя ў ката
Верабей
Анатоль Зэкаў
Ад марозу і завей,
Ад якіх бяда ўся,
Шэрабокі верабей
У хляве схаваўся
Запаслівая мышка
Анатоль Зэкаў
Мышка з поля ў норку
Нацягала зерня горку.
У зімовы сцюжны дзень
З горкай той не прападзе.
Зайкавы кажушкі
Анатоль Зэкаў
Зай на белы кажушок
Кажушок мяняе шэры,
Каб яго не ўбачыў воўк,
Што на зая зубы шчэрыць
Брошка
Валянцін Кодран(пераказ-мой)
Кароўка-багоўка-
Маленькі жучок.
Чорная галоўка.
З плямкамі бачок.
Па далоньцы ножкамі
Не паўзі на край!
Будзь маёю брошкаю
Ды не адлятай!
Зайкаў сон
Серафіма Бестава
З краю ў край завея злая
Гурбы снегу намятае.
Зайка хатачкі не мае,
Зайку холад прабірае.
Зайка есці вельмі хоча,
Ды на градках гола, пуста.
Толькі ён заплюшчыць вочы-
Сніцца хрумсткая капуста
Дзяцел
Анатоль Зэкаў
Дзяцел грукае, шчыруе-
Птушкам ён дамкі будуе.
Вернуцца вясной дахаты-
Будзе дуплаў ім багата.
Дзе ты быў?
Авяр'ян Дзеружынскі
-Коцік, коцік, дзе ты быў?
Дзе ты вусы намачыў?
-Бегаў я па роснай траўцы.
-Чаму ж роцік у смятанцы?